Ministria e Financave, Banka e Shqipërisë dhe Ministria e Bujqësisë dhe Zhvillimit Rural zhvilluan sot një takim të zgjeruar me drejtuesit e bankave tregtare, me fokus rishikimin e progresit të Skemës së Garancisë Sovrane për rritjen e kreditimit drejt bujqësisë dhe sektorëve prioritarë të ekonomisë.
Takimi u zhvillua në praninë e Ministrit të Financave Petrit Malaj, Guvernatorit të Bankës së Shqipërisë Gent Sejko, Ministrit të Bujqësisë dhe Zhvillimit Rural Andis Salla, si dhe drejtuesve të bankave tregtare dhe Shoqatës Shqiptare të Bankave. Qëllimi ishte vlerësimi i ecurisë së deritanishme, identifikimi i pengesave dhe përcaktimi i masave konkrete për të përmirësuar aksesin në financim për fermerët dhe bizneset MSME.
Ministri i Financave, Petrit Malaj, theksoi se bujqësia mbetet një prioritet strategjik i qeverisë, veçanërisht në prag të integrimit të Shqipërisë në tregun e përbashkët evropian. Sipas tij, Skema e Garancisë Sovrane duhet të shërbejë si një katalizator për rritjen e produktivitetit dhe vlerës së shtuar përgjatë zinxhirit prodhues. Ai nënvizoi se sektori do të mbështetet paralelisht edhe përmes skemës kombëtare të bujqësisë, paketës fiskale dhe rifillimit të IPARD III, për të siguruar qëndrueshmëri dhe atraktivitet afatgjatë për bankat dhe investitorët.
Guvernatori i Bankës së Shqipërisë, Gent Sejko, vlerësoi progresin e arritur dhe rolin e Skemës si instrument plotësues që përmirëson transmetimin e kreditimit drejt ekonomisë reale, duke ruajtur stabilitetin financiar dhe menaxhimin e kujdesshëm të rrezikut. Ai theksoi nevojën për adresimin e disa çështjeve operacionale dhe për koordinim të vazhdueshëm mes autoriteteve publike, bankave dhe institucioneve të përfshira, në mënyrë që skema të rrisë efektivitetin dhe përthithjen.
Nga ana e tij, Ministri i Bujqësisë Andis Salla deklaroi se skema ka filluar të japë rezultatet e para, me rritje të interesit dhe aplikimeve nga fermerë dhe biznese agro-përpunuese. Ministria dhe agjencitë e saj do të vijojnë informimin dhe asistencën për aplikuesit, duke forcuar bashkëpunimin trepalësh mes institucioneve publike, bankave dhe fermerëve.
Drejtuesit e bankave konfirmuan se pas fazës së njohjes, muajt e fundit kanë shënuar gjallërim të dukshëm, me një numër në rritje aplikimesh aktualisht në proces vlerësimi. Ata propozuan ndërhyrje të mëtejshme për rritjen e efikasitetit të skemave, të cilat u mirëpritën për shqyrtim nga autoritetet./vizionplus.tv
