Kanë përfunduar bisedimet dyditore mes delegacioneve të Rusisë, Shteteve të Bashkuara dhe Ukrainës në Abu Dabi, raportoi agjencia ruse RIA Novosti.
Megjithatë ende nuk është bërë asnjë njoftim zyrtar për përmbajtjen e tyre.
Gazetari i Axios, Barak Ravid, duke cituar zyrtarë ukrainas, bëri të ditur se bisedimet trepalëshe në Abu Dabi u vlerësuan si “pozitive” dhe “konstruktive”.
Sipas të njëjtave burime, procesi i dialogut nuk ka përfunduar, pasi është vendosur që një takim tjetër të zhvillohet javën e ardhshme, sërish në Abu Dabi, çka tregon se negociatat do të vazhdojnë.
Nga ana ruse është shprehur gjithashtu gatishmëri për vazhdimin e dialogut në një tjetër format.
Një përfaqësues i Ministrisë së Jashtme ruse deklaroi për RIA Novosti se Moska mbetet e hapur për vazhdimin e bisedimeve me Ukrainën në Stamboll.
“Ne mbetemi të hapur për dialog dhe vlerësojmë veçanërisht mikpritjen e Turqisë. Tani topi është në fushën e Ukrainës”, tha ai, duke ia kaluar përgjegjësinë për hapat e ardhshëm Kievit.
Witkoff dhe Kushner sot në Izrael
Të dërguarit e SHBA-së, Steve Witkoff dhe Jared Kushner ndodhen sot në Izrael, ku pritet të takohen me kryeministrin Benjamin Netanyahu për të diskutuar kryesisht të ardhmen e Gazës, raportoi Reuters, duke cituar burime të njohura me çështjen.
Të enjten, SHBA njoftuan plane për një “Gazë të Re”, që përfshijnë ndërtesa të larta banimi, qendra të të dhënave dhe resorte bregdetare, në kuadër të përpjekjeve të presidentit Donald Trump për të avancuar armëpushimin mes Izraelit dhe Hamasit.
Kreu i komisionit të përkohshëm palestinez që do të administrojë Gazën me mbështetjen e SHBA-së, Ali Saath, deklaroi se pika kufitare e Rafahut, praktikisht e vetmja rrugë hyrje-dalje për mbi 2 milionë banorët e enclaves, pritet të hapet javën e ardhshme./vizionplus.tv
