Ndërsa Presidenti amerikan, Donald Trump, vazhdon të kërcënojë se synon të marrë kontrollin mbi Groenlandën, aleatët e NATO-s kanë dërguar një numër të vogël trupash në ishull. Duke nisur nga e enjtja, vendet evropiane, mes të cilave Britania e Madhe, Franca, Gjermania dhe të tjera, vendosën ushtarët e parë në ishull me mision vëzhgimi dhe simbolik mbështetjeje. Numri i përgjithshëm i trupave që do të vendosen në Groenlandë pritet të rritet, ndërsa kohëzgjatja e operacionit nuk bëhet e ditur.
Qëllimi kryesor është të përcaktohet se si mund të duket një vendosje më e qëndrueshme tokësore në Groenlandë, për të siguruar SHBA-në se anëtarët evropianë të NATO-s e marrin seriozisht sigurinë e Arktikut. Kryeministrja daneze, Mette Frederiksen, theksoi këtë të premte se mbrojtja e Groenlandës është një shqetësim i përbashkët për të gjithë NATO-n.
Brenda aleancës po zhvillohen gjithashtu diskutime rreth krijimit të një misioni patrullimi ajror për Arktikun, i ngjashëm me operacionin ekzistues Eastern Sentry, në krahun lindor të NATO-s.
Edhe pse bisedimet datojnë që nga viti i kaluar, kur Trump përmendi për herë të parë marrjen e Groenlandës si president, ato janë intensifikuar ditët e fundit.
Presidenti Trump ka këmbëngulur se territori i Groenlandës është shumë i rëndësishëm për sigurinë e SHBA-ve dhe se mosmarrja e tij do t’i hapte rrugën Rusisë dhe Kinës për ta pushtuar.
/vizionplus.tv
