Eksperti i ekonomisë, Ergis Sefa, i ftuar në studion e “Quo Vadis” këtë të enjte, theksoi se sot Shqipëria nuk ka nevojë thjesht për largimin e qeverisë dhe ardhjen e opozitës në pushtet.
Sipas tij, zgjidhja qëndron te ndërtimi i një alternative më të mirë qeverisëse, ku në plan të parë të jetë qytetari dhe ku të ketë programe të qarta mbështetëse.
Ai theksoi se në zgjedhjet e fundit elektorale ajo që u vu re në programet e forcave politike ishte fakti se pothuajse të gjitha kishin programe të ngjashme dhe pa një qasje të qartë ideologjike.
“Ne si qytetarë duam alternativa. Programet e forcave politike ishin thuajse identike. Nuk shihje dallim të qartë mes programeve të majta dhe të djathta. Ajo që të habiste ishin premtimet që bënte opozita, të cilat kishin kosto të frikshme. Nga ana tjetër, qeveria që është e majtë kishte një qasje po aq të frikshme pro-biznesit”, u shpreh Sefa.
