Tiranë – Deputeti demokrat Flamur Noka akuzoi sot mazhorancën gjatë seancës plenare se po tallet me Kuvendin dhe qytetarët. Ai deklaroi se kryeministri Edi Rama “urren Kuvendin” dhe po përpiqet të shndërrojë Shqipërinë në një “Republikë ministrore”. Sipas Nokës, opozita është në Parlament për të përfaqësuar interesat e popullit dhe për të kërkuar llogari nga qeveria.
Noka: Ju po talleni me këtë Kuvend dhe me shqiptarët. Shqiptarët nuk mund të rrinë para ekranit dhe të shikojnë seanca 5 minutshe që zhvilloni ju. Ata presin që kryeministri të flasë për programin e qeverisë. Shqiptarët presin që sot të diskutohet në këtë parlament situata e nderë politike dhe ju keni një muaj që zhvilloni seancë pas seance sa për të thënë. Ne e dime që ka një urretje të kryeministrit për këtë parlament. Ai kërkon të projektojë në Shqipëri një Republikë ministrore. Ne këtu jemi për një agjendë tjetër, jemi këtu për të përfaqësuar popullin shqiptar dhe për të kërkuar llogari në emër të shqiptarëve.
Kujtojmë se në seancën e 18 shtatorit, ku ishte parashikuar të prezantohej programi qeverisës nga kryeministri Rama, ishte opozita ajo që shkaktoi tensione, duke bërë që seanca të mbyllej pas 30 minutash. Mazhoranca votoi e vetme programin qeverisës, ndërsa opozita kërkon anulimin e seancës ku u votua programi, dhe kërkon përsëritjen e saj./vizionplus.tv
