I dyshuar se ka bashkëpunuar në vrasjen e Fatmira Dedajt në 2013, që kërkonte vrasësit e djalit të saj Petrit Qoli dëshmoi në kuadër të dojes Plumbi i Artë. Për vrasjen e Elvis Dedës, prokuroria ka vënë nën akuzë vëllain e Petritit, Festimin. Ai thotë se ky i fundit është fatkeqësia e familjes së tyre. Me viktimën, Elvisin, Festimi kishte në pronësi një karburant ndarja e aksioneve të të cilit, sipas SPAK u bënë mollë sherri.
“Festimi është përgojuar që ka gjuajtur Titin, e ca të tjerë. Atij i pëlqente të njihej për këto. Është akuzuar për Loshin, Ervis Dedën, djalin e Fatmira Dedës. Por nuk e ka bërë. Vinte te anija ime, merrte naftë qyl. Loshi është bërë për rahmet. Nuk më vjen keq fare. E dëgjova në televizor. I shkova për qokë për kafe ngushëllim 7 ditë më pas. Karburantin e ka blerë i vetëm në fillim vëllai. Loshi i kërkoi lekët që kishte marrë borxh Festimi, ky i tha kur t’i gjej do t’i jap.Më tha Loshi mua që duhet të më japë lekët e karburantit. Nuk e di sa ishte shuma e lekëve”, thotë Petrit Qoli.
Petrit Qoli e vazhdon dëshminë e tij fillimisht duke thënë se nuk ka dijeni se kush e ka vrarë Elvis Dedën, por më pas tregon se ishte pikërisht vëllai i tij ai që i tregoi se ortaku i tij i dikurshëm ishte gjetur i vrarë.
“Nuk e di kush e ka vrarë. Vetëm llafe njerëzish. Loshi ka vjedhur drogë thonë. Ca të tjerë që kishte florinj në makinë a drogë. Unë nuk rroj i mbyllur, prokuror, në Durrës rroj. Marrim vesh gjëra, të gjithë thonë ndonjë gjë. 14 vjet duhet të ketë që është vrarë. E pashë te titrat e televizorit. E kishin nxjerrë foton. Festimin e kam takuar vëllain pas 3 javësh. Nuk e di ku ka qenë. Nuk ka qenë te prindërit. Sesi u vra Elvisi ma zbuloi Festimi, vëllai. Fatmirën e kam takuar tre herë në jetën time. Kur vajtëm për ngushëllim me babain, Fatmira i tha më fal se kam akuzuar Festimin nga tronditja. Isha unë, Agroni, babai, mamaja. Festimi ishte në kërkim policor. Babai i tha Fatmirës, nuk ka gjë mjafton të gjendet kush e ka vrarë”, tregon Petrit Qoli.
Ndërsa për Fatmira Habili Dedaj, për të cilën është vënë nën akuzë, ai thotë se ka dëgjuar se e kanë vrarë grabitësit që i kishin hyrë në garazh.
“Nuk kam shkuar në varrim. Nuk kam shkuar nga turpi i kapitenit, Besnikut, vëllait të saj. Di që vrasësi ka hyrë dhe ka marrë sende me vlerë. E kam dëgjuar në media. Është vrarë te garazhi ku kishte shtëpinë. Te pallati ku u vra, kam zyrat. Unë qenë me familjarët e mi. Isha në timon në Përrenjas, isha duke ikur në Pogradec. Më tha kushëriri im në telefon kanë vrarë nënën e Ervisit, kërkon policia Festimin. I thashë ç’më duhet mua me Festimin”, thotë Petrit Qoli.
Për këto krime të rënda ka hedhur dritë bashkëpunëtori i drejtësisë, Nuredin Dumani i cili, sipas dëshmive të tij ka qenë edhe vetë pjesëmarrës në ekzekutimin me thikë të Fatmira Dedës, ku ka bërë rolin e shoferit.
Ata donin ta vrisnin fillimisht teksa qante të birin në varreza, por mund të zbuloheshin ndaj e insekenuan krimin e rënde si grabitje. Për çdo lëvizije që bënte Fatmira, ka thënë Nuredin Dumani informonte Petrit Qolin.
