Ndërsa po ecte në nje nga sheshet e Beogradit me bashkëshorten e tij, ambasadori i Shteteve të Bashkuara në Serbi, Christopher Hill, është sulmuar verbalisht nga disa gra të cilat e kanë ka quajtur “vrasës” duke e akuzuar për pjesëmarrjen e shtetit të tij në bombardimet e NATO-së ndaj Serbisë në vitin 1999.
“Ne nuk do t’ju falim kurrë për krimet tuaja. Vrasësi i fëmijëve po shëtitë nëpër Beograd, i ftohtë si vdekja”, dëgjohet duke thënë njëra nga gratë në një video që është publikuar në rrjetet sociale.
Po ashtu, dëgjohen t’i drejtohen ambasadorit Hill duke bërtitur “Kosova është pjesë e Serbisë” dhe se “populli serb është me Rusinë”.
Por, diplomati amerikan nuk reagonte dhe vazhdonte rrugën e tij në kryeqytetin serb.
Christopher Hill, ka mbajtur poste të rëndësishme në diplomacinë amerikane.
Ai konsiderohet si një negociator i vështirë dhe këtë status e konfirmoi edhe gjatë periudhës kur ishte i dërguar special për Kosovën në negociatat e vitit 1999.
Diplomati amerikan shërbeu ne vende te ndryshme si dhe ka qenë ndihmës sekretar shteti për Azinë Lindore dhe Paqësorin.
