Më datë 11 maj në njësinë bashkiake numër 10 në kryeqytet dhe në Vorë do të votohet elektronikisht.
Prej datës 24 prill Komisioni Qendror i Zgjedhjeve po teston dhe informon qytetarët për mënyrën se si do të votohet elektronikisht në zgjedhjet e 11 majit.
Me dakordësi të palëve politike, Komisioni Qendror i Zgjedhjeve vendosi që për zgjedhjet e ardhshme parlamentare, në territorin e Shqipërisë të votohet në mënyrë elektronike vetëm në dy zona në Vorë dhe në njësinë 10 në Tiranë.
Stafi i rekrutuar nga KQZ do të vijojë të informojë qytetarët e dy zonave përkatëse për të gjithë procedurën e votimit.
Në zonën e njësisë 10 do të kenë mundësinë për të votuar rreth 40 mijë votues, ndërsa në Vorë rreth 30 mijë.
Sipas informacioneve të marra, Vizion Plus mëson se interesimi më i lartë nga qytetarët është nga moshat e treta për shkak të domosdoshmërisë për të mësuar përdorimin e pajisjes elektronike.
Për here të parë, votimi dhe numërimi elektronik u provua në zgjedhjet e vitit 2021, në njësinë 10 në kryeqytet, po ashtu në vitin 2023, u zgjerua në bashkitë Elbasan, Kamëz dhe Vorë.
Votimi dhe numërimi elektronik mundësojnë rezultate të shpejta nga mbyllja e votimit, duke shmangur vonesat apo konfliktet./vizionplus.tv
