Analisti Mentor Kikia, i ftuar në Quo Vadis të moderatores Pranvera Borakaj në Vizion Plus, ka komentuar situatën politike në Shqipëri dhe protestën e qytetarëve.
Ai tha se protesta nuk ka si qëllim zëvendësimin e një qeverie me një tjetër, por rrëzimin e sistemit politik.
Sipas tij, ky sistem politik ka dështuar dhe nuk prodhon më asgjë të mirë për qytetarët.
Pjesë nga biseda:
Kikia: Qeveria thotë se nuk i pëlqen protesta. Por kundërshtarin nuk e zgjedh ti. Protesta nuk është aty nëse të pëlqen apo jo. Ti nuk je juria për ta vlerësuar protestën nga niveli akademik, kulturor apo politik. Qeveria nuk e ka kuptuar se ata njerëz kanë dalë në rrugë sepse janë të pakënaqur nga qeveria.
Njerëzit nuk kërkojnë që administrata të përmirësojë punën, nuk kërkojnë që të bëhen disa ndryshime, por po kërkojnë jo thjesht largimin e një qeverie, por përmbysjen e një sistemi. Përmbysjen e një mekanizmi që i ka zënë frymën lirisë politike në këtë vend.
Qeveri pas qeverie, kryeministër pas kryeministri, me Ramën që po i vë kapakun, në këtë vend kanë degraduar standardet. Demokracia është bërë gjithnjë e më e brishtë, zgjedhjet janë bërë të pabesueshme, qytetarët nuk janë të lirë të zgjedhin, administrata shihet si pronë e partisë në pushtet, po ashtu edhe shteti.
I deleguari i partisë në qark është më i fuqishëm edhe se kryetari i bashkisë. Çfarë ka ndodhur? Partia ka marrë atributet mbi institucionet. Kjo ka ekzistuar vetëm në komunizëm. Për çdo emërim që ndodh në qark, pyetet fillimisht partia.
Është krijuar një mekanizëm që ka gërryer partitë politike, të cilat janë shndërruar në prona private të kryetarëve të tyre. Pse sot nuk ka kandidatë potencialë për të zëvendësuar Ramën dhe Berishën? Sepse askush nuk e ka menduar këtë, pasi ose do të përjashtohej, ose do të vetëpërjashtohej.
Është prodhuar mekanizmi i riciklimit të pushtetit, duke bërë bashkë pushtetin, politikën dhe paranë e krimit. Këto mekanizma shkulen vetëm duke çmontuar sistemin. Një pjesë e atyre njerëzve që janë në rrugë janë pikërisht për të çmontuar sistemin.
Borakaj: Sa imponues po bëhen ata, Mentor?
Kikia: Këto mekanizma janë të domosdoshëm për t’u kuptuar, sepse janë përcaktuesit e qeverisjes. Një qeveri që vjen duke vjedhur votën, do të vazhdojë të vjedhë. Një qeveri që vjen e ndihmuar nga paratë oligarkike, ndërkohë që partitë nuk deklarojnë nga vijnë fondet e tyre, është e lidhur me interesa. Një kompani që të jep para për të ardhur në pushtet, nesër do të kërkojë tender. Pra, kjo prodhon korrupsion. Të gjitha këto prodhojnë rezultatin që qytetari nuk e ka shtetin aleat.
