Pas bisedës telefonike me presidentin amerikan Donald Trump, presidentja e Komisionit Evropian, Ursula von der Leyen, deklaroi mbrëmjen e së enjtes se po shënohet “progres i kënaqshëm” drejt finalizimit të marrëveshjes tregtare mes Bashkimit Evropian dhe Shteteve të Bashkuara deri në fillim të korrikut.
“Patëm një bisedë shumë të mirë telefonike me presidentin Trump dhe të dyja palët mbeten të angazhuara për zbatimin e marrëveshjes. Po shënohet progres i kënaqshëm drejt uljes së tarifave doganore deri në fillim të korrikut”, deklaroi Von der Leyen.
Nga ana tjetër, presidenti amerikan Donald Trump njoftoi se i ka dhënë Bashkimit Evropian afat deri më 4 korrik për të zbatuar marrëveshjen tregtare të arritur me SHBA-në.
Kujtojmë se në fund të marsit, Parlamenti Evropian miratoi marrëveshjen tregtare mes SHBA-së dhe BE-së, e cila ishte arritur verën e kaluar në Turnberry të Skocisë.
Megjithatë, procedurat e brendshme të BE-së kërkojnë negociata të mëtejshme ndërmjet Parlamentit Evropian dhe Këshillit të BE-së për ratifikimin përfundimtar të marrëveshjes, përpara hyrjes së saj në fuqi.
Gjatë natës mes të mërkurës dhe të enjtes, diskutimet maratonë mes dy institucioneve evropiane nuk arritën në një marrëveshje përfundimtare. Sipas Presidencës Qipriote të BE-së, është regjistruar progres në disa çështje, ndërsa raundi i ardhshëm i negociatave është planifikuar për më 19 maj.
Ministri i Energjisë, Tregtisë dhe Industrisë së Qipros, Michalis Damianou, deklaroi se palët mbeten të përkushtuara për të vazhduar dialogun konstruktiv me Parlamentin Evropian, me synim përfundimin sa më të shpejtë të procesit legjislativ.
