Komandantë rusë dyshohet se kërcënojnë dhe detyrojnë ushtarët e tyre të marrin pjesë në sulme, sipas disa komunikimeve ushtarake të përgjuara dhe të publikuara nga media gjermane WELT.
Sipas raportimit, regjistrimet janë siguruar nga ushtria ukrainase dhe përmbajnë komunikime mes komandantëve dhe ushtarëve rusë që refuzojnë të marrin pjesë në sulme.
Në një prej regjistrimeve, një komandant dëgjohet duke kërcënuar trupat: Nëse ju kopilë nuk më përgjigjeni tani, do të hap zjarr mbi ju me një tank.
Në një tjetër komunikim, komandanti u thotë ushtarëve se nuk do të lejohen të largohen nga zona e luftimeve pa marrë më parë vendbanimin që u është caktuar si objektiv.
“Betohem, asnjëri prej jush nuk do të kthehet derisa ta merrni këtë vendbanim. Askush”, dëgjohet të thuhet në regjistrim.
Sipas pretendimeve të palës ukrainase, ushtarët rusë përballen gjithashtu me rrezikun e ndëshkimeve ekstreme nëse tentojnë të tërhiqen nga pozicionet e luftimit. Raportime për përdorimin e njësive që pengojnë tërheqjen e trupave ruse janë bërë edhe më herët gjatë luftës.
Komunikimet e përgjuara pretendohet se tregojnë gjithashtu për kushte të vështira në terren. Në disa prej tyre, ushtarët ankohen për mungesë të ushqimit dhe ujit. Një ushtar raportohet të ketë deklaruar se u është dashur të pinë urinën e tyre për shkak të mungesës së ujit.
Ndërkohë, një oficer i inteligjencës ukrainase pretendon se në raste të tjera ushtarët rusë kanë diskutuar edhe mundësinë e ngrënies së maceve për shkak të mungesës së ushqimit.
Pretendimet bazohen në materiale të publikuara nga pala ukrainase dhe të raportuara nga WELT.
