Kryetarja e Bashkisë Shkodër, Voltana Ademi u bëri thirrje shqiptarëve që të bashkohen në protestën e sotme në Bulevardin “Dëshmorët e Kombit”.
Sipas saj, në këto ditë të vështira është detyra e çdokujt që të mbrojë Shqipërinë.
Ademi e akuzoi kryeministrin Edi Rama në “Facebook” se po vë në rrezik demokracinë.
“Është detyrë e çdonjërit prej nesh, e çdo shqiptari të japë kontributin e tij për Shqipërinë, në këto momente shumë të vështira! Nuk është çështje partish, nuk është çështje thjesht e zëvendësimit të një qeverie me një tjetër! Është çështje e DEMOKRACISË që sot është në rrezik më shumë se asnjëherë! Ky kryeministër, jo vetëm nuk pyet për institucione, jo vetëm nëpërkëmb çdokënd që e kundërshton, jo vetëm shkel liritë e të drejtat më elementare të qytetarëve, por dhunon ditën për diell edhe në fokusin e mediave gazetarë, studentë, të rinj e të moshuar!”
Në orën 16.30 pritet që aktivistët, artistët, opozita dhe qytetarë të tjerë të nisin protestën e dytë pas shembjes së godinës së Teatrit Kombëtar.
