Arrihet marrëveshja mes Lidhjes Social-Demokrate dhe Bashkimit Demokratik për Integrim për formimin e Qeverisë së re të Maqedonisë së Veriut.
Burime për “Vizion Plus” tregojnë detaje nga marrëveshja e Ali Ahmetit dhe Zoran Zaev. Bëhet me dije se BDI do të marrë kryeparlamentin, Ministrinë e Jashtme, Financën, si dhe për poste të tjera të rëndësishme ne kabinetin qeveritar.
Sa i takon propozimit për një Kryeministër shqiptar është rënë dakord që mos të ketë qeveri teknike, por Zaev do t’i dorëzojë mandatin spektrit politik, duke propozuar një emër shqiptar. Pra, ka marre fund eksperimenti i qeverisë teknike 100 ditë përpara zgjedhjeve, ndërsa i është premtuar posti i kryeministrit BDI-së në këtë periudhë, pas konsensusit të partive politike në Maqedoninë e Veriut.
Kreu i LSDM-së, Zoran Zaev deklaroi se do të jetë kryeministër me mandat të plotë dhe se ky post nuk do të ndahet në rotacion me BDI-në, ndërsa lajmëroi se kryeparlamentar do të vazhdojë të jetë Talat Xhaferi nga BDI-ja.
“Lufta kundër koronavirusit do të jetë prioritet në punën e qeverisë, sikur edhe standardi ekonomik, rritja e pagave, lufta kundër krimit të organizuar dhe korrupsionit. Jemi pajtuar për forcimin e sistemit të drejtësisë, hetimin e pasurisë së funksionarëve dhe të kaluarën e tyre”, ka deklaruar kryetari i LSDM-së, Zoran Zaev.
