Kaosi në tregun e shitjes së vajit të ullirit po shkaktohet jo vetëm nga mbiprodhimi sezonal, por edhe nga informaliteti. Pjesa dërrmuese e fermerëve e shesin produktin të paambalazhuar dhe në informalitet brenda vendit. Si zgjidhje, Ministria e Bujqësisë, do të orientojë fermerët që pasi të prodhojnë vajin e ullirit, ta dorëzojnë në pikat e grumbullimit dhe përpunimit, të cilat më pas e bëjnë gati për ta eksportuar në tregjet e huaja. Investimi në teknologjitë e përpunimit dhe ambalazhimit do të vijë si ndihmë nga Italia.
ENIO CIVICI
MINISTER I BUJQESISE
“Do të fuqizohet dhe mbështetet hallka e përpunim-grumbullimit, që është hallka më e rëndësishme për të dalë në treg. Nuk ka pse një fermer ta prodhojë vajin e ullirit dhe ta marrë me vete në shtëpi, por ta shesë te pikat e grumbullimit, ku do të përpunohet, ruhet, paketohet siç duhet, për të aksesuar tregje të huaja me çmime të larta. Eksperiencën pozitive me fruta-perimet, do ta aplikojmë edhe me vajin e ullirit.”
Si pasojë e marrëveshjes së firmosur me Italinë, e cila ka shfaqur interes të blejë vajin e ullirit shqiptar, prodhimi i këtij sezoni, por edhe i viteve të mëparshme që ka mbetur stok, po inventarizohet, qoftë për sasinë, ashtu edhe për cilësinë, për ta dorëzuar më pas te blerësit italianë. Por pse Italia interesohet për vajin tonë të ullirit?
ENIO CIVICI
MINISTER I BUJQESISE
“Italia është një shtet i madh, që shet vaj ulliri shumë më shumë sesa tregu i saj. Për këtë përpunuesit italianë blejnë vaj nga vende si Spanja, jugu i Francës, apo vende si Shqipëria. E blen këtë vaj, e ripërpunon dhe më pas e nxjerr në treg si vaj të përpunuar italian.”
Në bashkëpunim me Italinë, në vitet e ardhshme Shqipëria synon që të krijojë një markë italo-shqiptare të vajit të ullirit, i cili të jetë i prodhuar në vendin tonë, i përpunuar në shtetin fqinj dhe i shitur në të gjithë botën.
