Dy muaj pas vrasjes tragjike të Hekuran Cumanit, 23-vjeçarit me origjinë shqiptare që humbi jetën në një parking pranë Universitetit të Perugias, vëllai i tij i vogël, Samuele, ka reaguar me një mesazh tepër prekës në rrjetet sociale.
Hekuran Cumani u vra me thikë në orët e para të mëngjesit, pas një sherri që nisi në një lokal studentor dhe përfundoi në një përleshje të dhunshme jashtë tij. Sipas hetimeve, i riu u godit për vdekje teksa po përpiqej të mbronte vëllain e tij, i cili mbeti i plagosur në këmbë.
Sot, dy muaj pas ngjarjes, Samuele ka publikuar një postim emocional, ku shpreh dhimbjen dhe vendosmërinë për të kërkuar drejtësi për vëllain e tij:
“Ti e ke dhënë jetën për mua, unë do ta jap gjithë jetën time që ti të kesh të gjithë drejtësinë. Sapo ta marrësh, do të shihemi atje lart, dashuria ime. Ta premtoj.
Mami të puth gjithmonë para se të flejë, por në foto. Nuk e ke idenë sa më dhemb kjo. Mezi pres të jemi sërish të gjithë bashkë.”
Mesazhi ka prekur thellë opinionin publik dhe ka rikthyer vëmendjen te një ngjarje që tronditi jo vetëm komunitetin shqiptar, por edhe atë italian, duke ngritur sërish thirrjet për drejtësi dhe zbardhje të plotë të vrasjes.
Ndërkohë, policia italiane ka arrestuar autorin e dyshuar të krimit. Bëhet fjalë për Yassin Amri, 21 vjeç, shtetas italian me origjinë nga Magrebi, i cili akuzohet për vrasjen e Hekuran Cumanit. Hetimet vijojnë për të zbardhur plotësisht rrethanat e ngjarjes.
/vizionplus.tv
