Evropa do të marrë sot vendimin e vështirë për përdorimin ose jo të aseteve të ngrira ruse për të financuar Ukrainën.
Liderët janë mbledhur në bruksel për të diskutuar idenë që është mbështetur deri tani nga Franca Gjermania dhe shumë vende të tjera me argumentin se një përgjgije e fortë ndaj Moskës është e nevojshme.
Të tjera vende me Hungarinë në krye kanë deklaruar se një vendim i tillë është budallalëk dhe një marshim drejt luftës që nuk duhet bërë.
Takimi i Brukselit, vjen vetëm një ditë pasi Presidenti i Rusisë Vladimir Putin tha me vendosmëri se do t’i arrijë qëllimet e tij në Ukrainë qoftë përmes bisedimeve apo përdorimit të forcës.
Madje ai shtoi se Rusia mund të marrë më shumë tokë ukrainase nëse Zelenksky dhe liderët europianë të cilët i quajti derra të vegjël, nuk do të angazhohen për paqe sipas planit amerikan.
“Nëse pala kundërshtare dhe patronët e saj të huaj refuzojnë të angazhohen në diskutime, Rusia do të arrijë çlirimin e tokave të saj me mjete ushtarake. Derrat e vegjël kanë nxitur histeri rreth një lufte të mundshme e se Moska një ditë mund të sulmojë një vend në aleancën ushtarake të NATO-s. E kam deklaruar vazhdimisht, kjo është një gënjeshtër dhe një absurditet I pastër”, tha Putin.
Shtetet e Bashkuara kanë zhvilluar bisedime me Rusinë, dhe veçmas me Kievin dhe udhëheqësit evropianë, mbi propozimet për t’i dhënë fund luftës në Ukrainë, por nuk është arritur asnjë marrëveshje.
Kievi dhe aleatët e tij evropianë janë të shqetësuar nga kërkesat për lëshime territoriale nga Ukraina e cila kërkon garanci më të forta sigurie.
