Presidenti amerikan Donald Trump në mbledhjen e parë të kabinetit për vitin 2019 ka folur dhe për mungesën e popullaritetit në Europë. Trump është shprehur për gazetarët, duke u shprehur shpërfillës për atë që mendojnë ne kontinentin e vjetër.
“Unë nuk duhet të jem popullor në Europë. Nëse do të isha i tillë, kjo do të tregonte se nuk po e bëja siç duhej punën time. Gjermania paguan 1 përqind të PBB-së, ndërsa duhet të paguajnë 4 për qind. Nuk duhet të jem popullor në Evropë. Dua që Evropa të paguajë. Nuk më intereson Evropa.”
Nga një sondazh i bërë së fundmi, besimi te Trump në Europë ka rënë ndjeshëm. Vetëm 10 për qind e gjermanëve, 9 për qind e francezëve, 7 për qind e spanjollëve dhe 28 për qind e britanikëve, e shohin lidershipin e Trumpit nën një dritë pozitive. Në një sondazh të Qendrës Kërkimore të 2016, 84 për qind e njerëzve në Gjermani, Britani, Francë, Kanada dhe Suedi besonin se presidenti amerikan do të bënte gjënë e duhur në çështjet botërore, por një vit më vonë, ky numër kishte rënë në 16 përqind.
