Ministrja e Shtetit për Rininë dhe Fëmijët, Bora Muzhaqi iu është përgjigjur reagimeve të shkaktuara pas veprimit të saj kur u pyet lidhur me vrasjen e Mateo Vasiut.
Më herët, gjatë ditës, ajo refuzoi t’iu përgjigjur pyetjeve të gazetarëve mbi abuzimet me fëmijët dhe vrasjen e të miturit Mateo Vasiu, duke shtuar se nuk ka asnjë lloj përgjegjësie mbi këto ngjarje.
Së fundmi, në një postim në “Facebook”, Muzhaqi ka qartësuar reagimin e saj, duke kërkuar ndjesë për keqkuptimin.
“Ndjesë nëse kam lënë shteg për keqkuptimin e kujtdoqoftë që ka pritur një përgjigje tjetër nga unë, përballë disa mediave të cilat m’u gjendën përballë duke shkuar për një tjetër takim pune. Jam thellësisht e prekur si të gjithë nga tragjedia e Fierit dhe besoj se gjithçka mund të bëhet më tutje për adresimin e çështjeve të pyetjes, do të bëhet, ashtu si duhet, nga institucionet. Detyra ime funksionale është angazhimi me programet jashtëshkollore të nxënësve e studentëve, si dhe programet e aktiviteteve për fëmijët në komunitet. Prandaj dhe nuk m’u duk e udhës të jap një opinion personal mbi fusha të tjera specifike për të cilat m’u drejtua pyetja. Ndërsa për sa i takon sarkazmës politike apo mediatike me tragjedinë, nuk kam asnjë koment. E kam neveritur gjithnjë lojën publike me dhimbjen e shkaktuar prej tragjedive. Por sot e provova shijen e saj drejtëpërdrejtë. Vdekja e dhunshme e një fëmije nuk mund të jetë kurrë arsye për të luajtur me njeri-tjetrin. Ndjesë edhe njëherë atyre që kanë keqkuptuar përgjigjen time”, shkruan Muzhaqi.
