Drejtori i Kabinetit në Partinë Demokratike, Dorian Teliti ka folur për politikat ekonomike të PD-së që synon t’i zbatojë sapo shqiptarët t’i besojnë qeverisjen e vendit.
Në një lidhje direkte me edicionin e lajmeve në “Vizion Plus”, demokrati deklaroi se çdo vendim i ndërmarrë në 12 muajt e fundit të qeverisjes së socialistëve do të kalojë në filtrin e ligjshmërisë, pas konstatimit nga ana e PD-së për rritje abuzimi me fondet publike.
Sa i përket miratimit të draftit të amnistisë fiskale nga qeveria, i cili synon të legalizojë pasuritë e fshehura të individëve brenda dhe jashtë vendit si dhe të bizneseve, Teliti e konsideroi jashtë interesave të qytetarëve.
Sipas tij, ky draft nuk i shërben emigrantëve, por “miqve të kryeministrit Rama”.
“Çdo vendim i ndërmarrë në 12 muajt e fund të qeverisjes së socialistëve do të kalojë në filtrin e ligjshmërisë. Pasi ajo që ne kemi konstatuar është që dita-ditës rritet abuzimi me fondet publike; shqiptarët po nëpërkëmben akoma edhe më shumë. Amnistia fiskale, e cila është e pakoordinuar, nuk është në interesin pubilk. Është ndër çokat e fundit që po mundohet qeveria t’i bëjë miqve dhe shokëve të pastrojnë ato para që i kanë marrë përmes krimit, drogës, tenderavë, për të cilat nuk kanë paguar detyrimet tatimore në të kaluarën. Ne jemi kundër kësaj. Do të duhej që të gjithë aktorët e tregut, përfaqësuesit e biznesit dhe shoqëria civile të gjenin gjuhen e përbashkët për të ndërmarrë një amnisti fiskale, e cila të ishte zgjidhëse e situatës. Nuk i shërben shqiptarëve dhe emigrantëve. Emigrantët nuk kanë 200 apo 300 mijë euro për t’i ligjëruar në Shqipëi. Ju siguroj që të gjithë vijnë këtu me pak para në xhepin e tyre. Nevojitet që çdo vendimmarrje e këtij niveli duhet marrë me një konsensus të përgjithshëm politik, duke përfshirë shoqërinë civile dhe grupet e interesit.”
Në lidhje me një nga zotimet e PD-së për vendosjen e taksës së sheshtë, demokrati tha se është i vetmi ilaç për të përmirësuar situatën.
“Në mënyrë që biznesi të përfitojë dhe punësimi të rritet është implementimi taksës së sheshtë dhe çlirimi i tregut nga të gjithë pjesët procedurale administrative. Me taksimin e sheshtë do të rriten të ardhurat në buxhetin e shtetit.”
