Rruga nacionale Burrel – Peshkopi veç problemeve të dukshme në sipërfaqe, ka edhe probleme të tjera të cilat gjatë lëvizjes në të nuk vihen re. Një pjesë e kësaj rruge, shumë shpejt është drejt shembjes, pikërisht në Njësinë Administrative Suç të Bashkisë Klos.
Në dalje të rrugës së fshatit Kurdari apo në hyrje të rrugës për tek njësia Administrative Suç, rruga po shembet nga ana e lumit.
Nën rrugë po krijohet një hapesirë, e cila sa vjen e zmadhohet, çdo ditë e më shumë. Pjesa shkëmbore e saj po shkëputet dalëngadalë për shkak të prezencës së vazhdueshme të ujit. Ndonëse mbi rrugë nuk duket asgjë, kjo është pamja nga poshtë kur mjetet, sidomos ato të tonazhit të rëndë kalojnë mbi të.
Ekspertët rrugor, këshillojnë një ndërhyrje të menjëhershme në mënyrë që shembja të ndalet e të mos vazhdojë për shkak se mund të rrezikohen mjetet që kalojnë mbi të. Sipas tyre, nëse nuk do të ndërhyhet, shumë shpejt do të ketë shembje të tjera të shkëmbit, deri në shembjen e rrugës.
