Kryeministri i Kosovës, Albin Kurti priti këtë të mërkurë në një takim në Prishtinë kryetarin e Grupit Parlamentar të Partisë Socialiste, Taulant Balla.
Pas takimit, Kurti deklaroi se në fokus të bisedës ishte rëndësia e bashkëpunimit të marrëveshjeve ndërmjet dy qeverive, në veçanti marrëveshjet e fundit të firmosura pak ditë më parë në Elbasan.
“Edhe Kuvendet tona respektive do të mund të japin kontributin e tyre, duke kërkuar llogaridhënie nga qeveritë se çfarë kemi bërë për të zbatuar marrëveshjen, por njëkohësisht edhe për t’u harmonizuar e sinkronizuar sa më shumë në arenën ndërkombëtare përsa i përket politikës së jashtme. Në Kosovë partitë politike nuk kanë dallime, sa i përket çështjes së Kosovës, por natyrisht nuk kanë as dallime përsa i përket çështjes së Shqipërisë, ndaj kjo e përbashkët e jona duhet të bëhet më funksionale dhe më aktive.”
