Prokuroria e Posaçme ka nisur verifikimin e çështjes “McGonigal”, pas kallëzimit të bërë nga deputeti i partisë demokratike Gazmend Bardhi.
Në padinë e tij, ky i fundit kërkon të hetohen lidhjet e kryeministrit Edi Rama me ish-zyrtarin e lartë të FBI Charles McGonigal. Sipas Bardhit, SPAK duhet të shqyrtojë çdo akuzë, pasi sipas tij Rama ka paguar ish-zyrtarin amerikan për të sajuar lobimin e PD me para ruse.
Kallëzimi i Gazmend Bardhit është bërë në SPAK më 24 janar, ndërkohë që këtë të martë, kreu i këtij institucioni Altin Dumani i ka përcjellë një kërkesë deputetit demokrat duke i kërkuar që të plotësojë dosjen dhe të dorëzojë dokumentet që ai pretendon se ka.
Në shkresën e firmosur nga Dumani kërkohet të dërgohet akt-padia e Zyrës së Prokurorit të Distriktit të Kolumbias.
Dosja Mc Gonigal trazoi politikën shqiptare pasi opozita akuzon kreun e qeverisë Edi Rama se ka korruptuar ish zyrtarin e lartë të FBI për të goditur partinë demokratike.
Berisha dhe Meta në unision kanë kërkuar dorëheqjen e kryeministrit, ndërsa ky i fundit ka mohuar çdo lidhje me hetimin që po zhvillohet në SHBA.
