Shërbimi Informativ Shqiptar ka reaguar në lidhje me lajmin për publikimin e informacioneve sekrete.
Në një njoftim në faqen zyrtare në internet SHISH thekson se lajmi është I pavërtetë pasi informacioni në këtë institucion trajtohet në bazë të rregullave ligjore dhe në përputhje me standardet e NATO.
“Lajmi për publikimin e informacioneve sekrete të SHISH është i pavërtetë. SHISH deklaron se e trajton informacionin e klasifikuar në bazë të rregullave ligjore dhe në përputhje me standardet e NATO-s dhe BE. Me keqardhje nuk mund të bëjmë asnjë koment më shumë.”
Të shtunën media prestigjoze “The Independent” publikoi një artikull ku tregoi se të gjithë emrat e agjentëve sekretë të SHISH ishin publikuar në faqen e Minsitrisë së Financave.
Në një shkrim kushtuar këtij skandali, media britanike “The Independent”, duke mos zbuluar emrat apo detaje të tjera identifikuese në mënyrë që të parandalojë pasojat e mundshme ndaj agjentëve, shkruan se Shqipëria ka publikuar informacione të ndjeshme në lidhje me punonjësit e saj më të lartë të SHISH në internet, duke zbuluar në këtë mënyrë detaje rreth identitetit të tyre, automjeteve, roleve operacionale, lëvizjeve të udhëtimit dhe zakoneve të përditshme dhe duke i vënë ato në dispozicion të publikut.
Sipas “The Independent” rrjedhja e informacionit nga shërbimi, që supozohet të jetë sekret duket të jetë e madhe dhe potencialisht e rrezikshme për NATO-n por mund të kenë pasoja edhe ndërkombëtare.
