Zëvendëspresidentja amerikane Kamala Harris njoftoi të mërkurën se një astronaut ndërkombëtar do të zbresë në sipërfaqen e Hënës si pjesë e programit Artemis të NASA-s.
Ndërsa Shtetet e Bashkuara ishin zotuar më parë të dërgonin astronautët ndërkombëtarë rreth hënës në misionet e ardhshme Artemis, njoftimi i sotëm e çon këtë angazhim një hap më tej duke lejuar një prej tyre të ecë në të vërtetë në sipërfaqen e hënës,duke iu bashkuar kështu një klubi elitar që deri më tani ka vetëm 12 anëtarë.
“Jam krenare të njoftoj se, së bashku me astronautët amerikanë, ne synojmë të zbarkojmë një astronaut ndërkombëtar në sipërfaqen e hënës deri në fund të dekadës”, tha Harris të mërkurën gjatë një takimi të Këshillit Kombëtar të Hapësirës të Shtëpisë së Bardhë në Uashington, DC.
Në takim morën pjesë edhe Sekretari i Shtetit Antony Blinken dhe këshilltari i Sigurisë Kombëtare Jake Sullivan.
Çdo mision i planifikuar për ulje në Hënë do të ketë vend për katër astronautë, por jo çdo astronaut do të ecë në hënë. Vetëm dy astronautë për mision do të zbresin në sipërfaqen e hënës, ndërsa dy të tjerët do të rrotullohen rreth hënës vetëm në anijen kozmike Orion ose në një stacion të vogël hapësinor të quajtur Gateway./vizionplus.tv
