Edhe Maqedonia e Veriut, pas një fushate 20 ditore është në heshtje zgjedhore. Këtë të shtunë, për zgjedhjet lokale votojnë grupe të caktuara, duke përfshirë personat që jane të infektuar me koronavirus, të burgosurit si edhe të moshuarit në azile.
Qytetarët do të zgjedhin midis 301 kandidatëve për 80 komunat e vendit dhe Shkupin si dhe anëtarët e këshillave komunalë.
Të drejtë vote kanë rreth 1 milion e 800 mijë qytetarë, të cilët për herë të parë do të votojnë me pajisje biometrike për identifikimin e votuesve. Në këtë garë, ato që tërhoqën vemendjen janë dy koalicionet parazgjedhore ndëretnike: LSDM, BDI dhe BESA në njërën anë dhe VMRO-DPMNE, Aleanca për Shqiptarët dhe Alternativa nga ana tjetër.
Komunat ku do të përqendrohet gara mes partive maqedonase janë Shkupi, Manastiri, Prilepi, Ohri, Kumanova dhe Shtipi, ndërsa mes atyre shqiptare, janw Tetova, Çairi, Gostivari, Struga, Kërçova dhe Dibra.
Zgjedhjet lokale janë planifikuar në dy raunde. Që të shpallët fitues një kandidat duhet të fitojë 50% të votave.
Nëse asnjë prej tyre nuk e kap këtë shifër, kalohet në votimet e raundit të dytë për atë komunë ku garojnë vetëm 2 kandidatët me numrin më të madh të votave. Raundi i dytë do të mbahet në 31 tetor.
