Delegacioni i lartë i qeverisë amerikane ka siguruar edhe angazhimin e Beogradit zyrtar për të nisur sa më parë zbatimin e marrëveshjes për normalizimin e marrdhënieve ekonomike me Kosovën, e nënshkruar në praninë e presidentit Donald Trump, në Shtëpinë e Bardhë.
Kryeministrja e Serbisë, Ana Bërnabiq dhe kryeshefi ekzekutiv i Korporatës Ndërkombëtare të Financave dhe Zhvillimit në SHBA, Adam Boehler, firmosen një deklaratë të përbashkët, përmes së cilës u zotuan të zbatojnë marrëveshjen e 4 shtatorit.
E njëjta deklaratë u finalizua një ditë më parë me qeverinë e Kosovës.
I dëguari i presidentit Trump për dialogun, Richard Grenell në një konferencë të përbashkët me presidentin e Serbisë, nënvizoi se mosmarrëveshjet politike do të zbehen vetëm pasi qytetarët e rajonit të munden të jetojnë më mirë.
RICHARD GRENELL
I DERGUARI I SHBA PER DIALOGUN
“Nuk duam të bëjmë simbolizëm politik por të mbajmë premtimet. Ne duam të përmbushim zotimet tona dhe ti përkthejmë në vende pune e investime. Ky vizion i presidentit Trump reflekton besimin se normalizimi ekonomik mund të sjellë paqe në rajon. Lufta politike do të fillojë të zvogëlohet kur njerëzit të shohin se normalizmi ekonomik funksionon, këtë e kemi parë edhe në SHBA.”
Ndërkohë, kreu i shtetit serb deklaroi se marrëveshja për normalizimin ekonomik është më e mira e arritur me Shtetet e Bashkuara që nga viti 1881.
ALEXANDER VUCIC
PRESIDENT I SERBISE
“Kjo është një ditë e rëndësishme për bashkëpunimin tregtar mes Serbisë dhe Shteteve të Bashkuara. Absolutisht jam i sigurt se mund të arrijmë rezultate të mëdha me miqtë tanë amerikanë. Aty ku amerikanët duan të investojnë, atje ku është agjencia amerikane e zhvillimit, ka punë. Do të mbrojmë interesat tona, por gjithashtu do të kujdesemi për prosperitetin e njerëzve. Ne do të ndërtojmë rrugë, hekurudha dhe investime te tjera.”
Në ceremoninë e nënshkrimit të deklaratës u bë edhe hapja simbolike e zyrës së Korporatës Ndërkombëtare amerikane të Financave dhe Zhvillimit në Beograd.
