Presidenti amerikan Donald Trump ka vendosur të shtyjë me tre ditë vendosjen e tarifave të reja prej 50% ndaj një game të gjerë mallrash kanadeze, teksa SHBA dhe Kanadaja po përpiqen të finalizojnë një marrëveshje tregtare.
Lajmi është bërë i ditur nga vetë presidenti i Shteteve të Bahskuara të Amerikës Donald Trump përmes një postimi në rrjetin social “Truth”.
“Kam pezulluar tarifat 50% ndaj Kanadasë, të cilat duhej të hynin në fuqi nesër në mëngjes, për një periudhë tre ditore, bazuar në faktin se Kanadaja dhe SHBA-ja, në pritje të finalizimit të dokumenteve, kanë një marrëveshje”, shkroi Trump.
Vendimi u njoftua më pak se dy orë përpara se tarifa e re të hynte në fuqi dhe të prekte rreth 20 miliardë dollarë importe kanadeze.
Negociatat intensive – Trump dhe kryeministri kanadez Mark Carney kanë zhvilluar dy biseda gjatë kësaj jave, ndërsa negociatorët e dy vendeve kanë qenë në bisedime intensive që prej korrikut.
Carney konfirmoi se është bërë përparim i rëndësishëm, por theksoi se ende mbetet punë për t’u përfunduar.
“Është bërë përparim i konsiderueshëm, megjithëse ka ende punë të rëndësishme për t’u bërë”, tha kryeministri kanadez.
Tarifat e kërcënuara nga Trump do të prekni një gamë të gjerë produktesh kanadeze, përfshirë verën, produktet e bulmetit, çimenton, veshjet dhe pajisjet e hokejit.
Ato do t’u shtoheshin tarifave që SHBA-ja ka vendosur tashmë ndaj çelikut dhe aluminit, automjeteve dhe lëndës drusore kanadeze.
Akses për produktet amerikane – Sipas zyrës së Përfaqësuesit Tregtar të SHBA-së, marrëveshja e mundshme do të përfshijë akses më të gjerë në tregun kanadez për produktet amerikane, angazhime për sigurinë ekonomike dhe përafrim në tregtinë digjitale.
Uashingtoni kërkon gjithashtu që Kanadaja të heqë tarifat hakmarrëse ndaj automjeteve amerikane dhe të ndryshojë kuotat për produktet e bulmetit, në mënyrë që prodhuesit amerikanë të kenë akses më të madh në tregun kanadez.
Një tjetër pikë e diskutimeve është ndalimi i shitjes së alkoolit amerikan në disa provinca kanadeze. Masat u vendosën vitin e kaluar si kundërpërgjigje ndaj tarifave të Trumpit.
Rikthimi i projektit Keystone XL – Trump tha gjithashtu se një marrëveshje përfundimtare mund të hapë rrugën për ringjalljen e projektit të gazsjellësit/naftësjellësit Keystone XL, i cili do të lidhte Albertën në Kanada me SHBA-në.
Projekti, i kundërshtuar prej vitesh nga ambientalistët dhe grupet indigjene, ishte bllokuar nga administratat Obama dhe Biden. Trump e përshkroi mundësinë e rikthimit të tij si zgjimin nga “varri” të Keystone XL.
Tarifat ndaj makinave – Sipas Reuters, në orët e fundit të negociatave palët po diskutonin uljen e tarifave amerikane ndaj automjeteve kanadeze nga 25% në 15%.
Megjithatë, dy vendet ende nuk kishin rënë dakord se cilat automjete do të përfitonin nga ulja. SHBA-ja kërkon që ajo të zbatohet vetëm për automjetet që kanë një përqindje të lartë të komponentëve të prodhuar në Amerikë.
