Ministria e Mbrojtjes ka bërë bilancin e situatës së zjarreve në vend gjatë 24 orëve të fundit, ku janë raportuar gjithsej 25 vatra zjarri. Sipas njoftimit, 4 vatra mbeten aktive, ndërsa një tjetër është nën monitorim.
Në operacionet për shuarjen e flakëve janë angazhuar 350 forca operacionale dhe 26 automjete zjarrfikëse. Në mbështetje të tyre, Forcat e Armatosura kanë angazhuar 140 efektivë, 3 helikopterë dhe 2 avionë Air Tractor.
Vatrat kryesore aktive janë në Dajt dhe Priskë në Tiranë, Lufaj në Mirditë dhe Tërbun në Pukë. Në Dajt po vijon operacioni me 50 efektivë të Forcave të Armatosura, 15 zjarrfikës dhe 5 forca të Agjencisë së Mbrojtjes Civile. Sipas autoriteteve, aktualisht nuk ka rrezik për zonat e banuara.
Në Tërbun të Pukës vijon angazhimi i strukturave vendore, vullnetarëve dhe Forcave të Armatosura, me mbështetjen e dy helikopterëve. Edhe në këtë zonë, autoritetet raportojnë se banesat nuk janë në rrezik.
Ndërkohë, situata paraqitet në përmirësim në disa prej vatrave të raportuara gjatë ditëve të fundit. Gurë-Lura, Bruçi në Mat, Tharri në Mirditë dhe zjarri në Selenicë janë shuar plotësisht, ndërsa në Qafë Helmes vijon monitorimi dhe ndërhyrja me forcat lokale.
Strukturat e Mbrojtjes Civile vijojnë operacionet në terren, me fokus izolimin e plotë të vatrave aktive dhe mbrojtjen e zonave të banuara nga përhapja e mundshme e zjarreve.
/vizionplus.tv
