Rusia ka ndërmarrë një tjetër sulm masiv me raketa balistike dhe dronë ndaj Ukrainës, duke goditur objektiva civile. Gjatë sulmeve është goditur edhe kompleksi rezidencial ku banon ambasadori shqiptar në Ukrainë. Fatëemirësisht ka patur vetëm dëme materiale dhe jo të lënduar.
Mnistri i Jashtëm Ferit Hoxha reagoi ashpër, duke dënuar sulmin.
“Shqipëria dënon me forcë një tjetër sulm brutal në shkallë të gjerë me raketa balistike dhe dronë të nisur mbrëmjen e fundit nga Rusia ndaj objektivave civile në Ukrainë, në një shpërfillje totale të jetës dhe dinjitetit njerëzor. Këtë herë u godit kompleksi rezidencial ku banon Ambasadori i Shqipërisë në Ukrainë, duke e vënë jetën e tij në rrezik serioz. Kjo është e papranueshme!
Targetimi i zonave civile dhe vënia në rrezik e personelit diplomatik përfaqëson një përshkallëzim të rëndë dhe një tjetër kujtesë të zymtë të kostos njerëzore të agresionit të vazhdueshëm të Rusisë”, tha ministri i Jashtëm Ferit Hoxha.
Hoxha shprehu edhe njëherë mbështetjen për Ukrainën ndërsa në lidhje me ngjartjen bëri të ditur se ka thirrur ambasadorin rus për shpjegime.
“Shqipëria do të vazhdojë të qëndrojë fort pranë Ukrainës dhe përsërit mbështetjen e saj të palëkundur për sovranitetin, pavarësinë dhe integritetin territorial të Ukrainës. Ata që janë përgjegjës për këto sulme duhet të mbahen përgjegjës. Ambasadori i Federatës Ruse në Shqipëri është thirrur për shpjegime”, tha Hoxha.
Ky sulm konsiderohet një përshkallëzim i rëndë i agresionit rus dhe një kërcënim serioz për personelin diplomatik.
