Brezat më të rinj mund të po plaken biologjikisht më shpejt se paraardhësit e tyre, ndërsa në të njëjtën kohë po shtohen rastet e diagnostikimit me kancer te personat nën moshën 50 vjeç. Këtë e sugjeron një studim i publikuar në revistën shkencore Nature Medicine.
Sipas hulumtimit, personat e lindur mes viteve 1965 dhe 1974 kishin një moshë biologjike më të lartë krahasuar me ata të lindur në periudhën 1950-1954. E njëjta prirje u vu re edhe te të lindurit mes viteve 1990 dhe 1999, të cilët rezultuan të plaken biologjikisht më shpejt se grupi i lindur në vitet 1965-1969.
Mosha biologjike tregon nivelin e plakjes së organizmit në nivel qelizor dhe molekular dhe nuk përkon domosdoshmërisht me moshën kronologjike të një personi.
“Rezultatet tona sugjerojnë se disa të rritur të rinj mund t’i përjetojnë këto ndryshime më herët nga sa pritej, gjë që mund të lidhet me rritjen e rasteve të kancerit në këto breza”, deklaroi Dr. Yin Cao, profesor i asociuar në Universitetin e Uashingtonit dhe bashkautor i studimit.
Edhe pse kanceri është konsideruar tradicionalisht si një sëmundje që prek kryesisht moshat e mëdha, rastet e diagnostikuara para moshës 50 vjeç janë rritur ndjeshëm gjatë tre dekadave të fundit. Sipas të dhënave të cituara nga Euronews, një raport i publikuar në BMJ tregon se rastet e reja të kancerit me shfaqje të hershme janë rritur me 79% në nivel global që nga viti 1990.
Shqetësim paraqet edhe rritja e rasteve te fëmijët dhe adoleshentët. Sipas Sistemit Evropian të Informacionit për Kancerin (ECIS), që nga viti 2022 rreth 13.800 fëmijë dhe të rinj janë diagnostikuar me kancer në 27 shtete anëtare të Bashkimit Evropian.
Ekspertët besojnë se plakja e përshpejtuar biologjike mund të jetë një nga faktorët që lidhen me këtë fenomen. Studime të mëparshme kanë evidentuar edhe faktorë të tjerë të mundshëm të rrezikut, si konsumimi i ushqimeve ultra të përpunuara, alkooli, obeziteti, duhani dhe ekspozimi ndaj mikroplastikës.
Megjithatë, studiuesit theksojnë se gjetjet nuk provojnë një lidhje të drejtpërdrejtë shkak-pasojë mes plakjes biologjike dhe kancerit. Ato tregojnë një lidhje të rëndësishme që kërkon studime të mëtejshme për të kuptuar arsyet e rritjes së rasteve të kancerit në moshë të re dhe për të zhvilluar strategji më efektive parandaluese.
/vizionplus.tv
