Ish-deputeti i Partisë Demokratike, Luçiano Boçi kërkoi nga qeveria të reagojë dhe të tregojë cilat janë planet e saj për zhvillimin e mësimit me nisjen e vitit të ri mësimor.
Në një deklaratë për mediat, Boçi tha se asnjë prind nuk e ka të qartë se çfarë do të ndodhë me shkollimin e fëmijëve të tyre. Ai akuzoi qeveritarët se nuk po e “vënë ujin në zjarr”.
“Kryeministri në ikje Edi Rama vazhdon të bëjë plazh, qeveria vazhdon të jetë me pushime, ndërsa një krizë e re po troket në derën e pothuajse çdo familje shqiptare. Sot asnjë prind nuk e di çfarë do të bëhet me shkollimin e fëmijëve të tyre. Askush nuk e di, nëse do të hapen apo jo shkollat, sepse Edi Rama dhe qeveria e tij e dështuar nuk kanë asnjë plan. Prej të paktën dy javësh, siç ndodh zakonisht, mbi 640 mijë nxënës dhe studentë presin lajmin për ngjarjen më të rëndësishme të jetës së tyre, nisjen e fillimit të vitit shkollor dhe akademik, por qeveria hesht. Ministria e Arsimit nuk ka publikuar asnjë plan, asnjë strategji për mënyrën e zhvillimit të mësimit në sistemin parauniversitar dhe atë universitar.”
Në vijim të deklaratës, Boçi mori shembuj Gjermaninë, Italinë, Francën dhe vende të tjera që sipas tij kanë vendosur të rikthejnë nxënësit në shkollë. Ai tha se ka ardhur momenti që Edi Rama dhe ministrja Besa Shahini të shpjegojnë se çfarë do të ndodhë.
“Shumë vende evropiane si Gjermania, Italia, Franca, Britania e Madhe, Greqia kanë studiuar dhe kanë marrë të gjitha masat për rikthimin e nxënësve në auditorë në fillim të shtatorit, ndërsa Shqipëria nuk ka asnjë plan të tillë. Edi Rama është në rehatinë e plazhit, ndërsa Besa Shahini, ikonë e paaftësisë së kësaj qeverie, është në ethet e shkarkimit. Askush nuk do t’ia dijë se çfarë do të ndodhë me mësimin, me nxënësit, me mësuesit. Si çdo kryeministër tjetër në Eropë, duhet të shpejgojë cili është plani për shkollat, nëse do të rihapen apo jo, çfarë masash janë marrë për klasat, nëse do të ketë rihapje, çfarë po bëhet për mësimin online, pasi ai që fëmijët bënë në karantinë është një vit i djegur, ku fëmijët mësuan pak ose aspak.”
