Kosova ka shprehur gatishmërinë për t’i ardhur në ndihmë Shqipërisë dhe Malit të Zi në përballjen me zjarret.
Ka qenë ministri i Mbrojtjes së Kosovës Ejup Maqedonci, i cili përmes një deklarate, ka bërë me dije se ka komunikuar me homologët e tij, Ermal Nufi dhe Dragan Krapović ku ka shprehur mbështetjen përmes kapaciteteve që shteti Kosovës disponon.
“Nëse autoritetet përkatëse e konsiderojnë të domosdoshme një ndihmë të tillë, Kosova është e gatshme të kontribuojë, duke vënë në dispozicion kapacitetet tona për përballimin e situatës së shkaktuar nga zjarret. Në rrethana të tilla, bashkëpunimi dhe solidariteti kanë rëndësi të posaçme. Ministria e Mbrojtjes, Forca e Sigurisë së Kosovës dhe institucionet e tjera të Republikës vazhdojnë të jenë të gatshme për të dhënë mbështetje dhe për të kontribuar kudo që kapacitetet tona mund të shërbejnë”, deklaroi Maqedonci.
Situata me zjarret në Shqipëri paraqitet problematike. Epiqendër ka qenë zona e Krujës, ashtu edhe Lura e fshati Priskë e Madhe në Tiranë. Kryesisht vatrat kanë prekur zona me pyllëzim të dendur, ndërsa ka pasur raste dhe të rrezikimit të banesave. Vatra aktive janë raportuar dhe në zona të tjera të vendit, por fatmirësisht nuk ka pasur persona të lënduar apo banesa të dëmtuara.
Ndërkohë në Malin e Zi, situata është paraqitur e vështirë ë zonën e Velestovës dhe Çevos, ku u angazhuan edhe helikopterë për shuarjen e zjarreve. Vatra janë raportuar dhe në zona të tjera, të vaforizuara nga temperaturat e larta dhe erërat e forta.
