Nuk ka ende asnjë afat se për sa kohë do të qëndrojnë në fuqi masat që kufizojnë lëvizjen e këmbësorëve dhe makinave personale.
Në intervistën e dhënë për edicionin e lajmeve në Vizion Plus, kryeministri Edi Rama deklaroi se askush nuk mund t’a parashikojë kohëzgjatjen e ndalim-qarkullimit, i cili nga e Hëna e 30 Marsit do të lejojë vetëm një anëtar të familjes të dali për të blerë produkte ushqimore apo farmaceutike.
EDI RAMA
KRYEMINISTER I SHQIPERISE
Kjo është një pyetje përgjigjen e të cilës nuk ka arritur ta gjejë asnjë njeri në planet dhe nuk mund ta kem as unë. Nëse do ta kem, do ta them me shumë kënaqësi. Por fatkeqësisht deri tani askush nuk e ka në asnjë vend të botës. Nuk kemi bërë një kufizim të ri, por thjesht kemi racionuar lëvizjen që do të thotë që kemi ngritur sistemin në bazë të teknologjisë që do t’ju mundësojë të gjithë qytetarëve që kanë nevojë për të dalë për të bërë pazar, për të blerë ushqime, për të blerë ilaçe apo për të kryer një shërbim tjetër që të marrin një leje drejtpërdrejt nga smartphone apo me sms nga telefoni normal. Që do të thotë që në këtyë mënyrë vetëm një anëtar i familjes mund të lejohet të dalë për të bërë pazar, asnjë pensionist nuk do të lejohet të dalë më nga shtëpia.
Në situatën kur numri i të infektuarëve dhe jetët e humbura shënojnë rritje, kreu i qeverisë garantoi mjete të mjaftueshme mbrojtëse për mjekët në të gjithë vendin.
Unë mendoj që kjo është një luftë dhe luftë pa viktima nuk ka. Ajo që besoj është e rëndësishme është që të vazhdojmë të bëjmë këtë që po bëjmë dhe të ulim në maksimum numrin e viktimave dhe peshën e vuajtjeve që do të kalojmë deri në përfundim të kësaj lufte. Duke parë projeksionet e mundshme që janë publikuar nga individë të pavarur, patjetër që janë jetë të humbura. Por krahasuar me çfarë mund të ndodhte nëse nuk do të bënim këtë që po bëjmë, është një minimun i minimumit të minimumit. Para pak ditësh ndoqa një ekspert me një projeksion prej 18 mijë viktimash. Kështu që po bëjmë atë që duhet dhe po e bëjmë në kohën e duhur dhe uroj dhe lutem që ta bëjmë kështu deri në fund. Me siguri që do të minimizojmë fatalitetet.
Gjatë intervistës për Vizion Plus, kryeministri komunikoi edhe shifrën e plotë të shqiptarëve që do të riatdhesohen pas mbylljes së kufijve për shkak të koronavirusit. Nga e Hëna do të nis kthimi i tyre pa pagesë nga të gjithë vendet e Evropës ku kanë mbetur të bllokuar.
