Sekretari i Shtetit Amerikan Mike Pompeo duket se po tërhiqet nga një teori që ai dhe presidenti Donald Trump mbronin publikisht deri para pak ditësh.
Pompeo mendonte se koronavirusi mund ta ketë origjinën në një laborator në Wuhan të Kinës. Por gjatë një interviste televizive, ai u duk se bëri hapa pas.
“Ne e dimë se filloi në Wuhan, por ne nuk e dimë se nga ose nga kush, dhe këto janë gjëra të rëndësishme. Ne kemi kërkuar vazhdimisht që ekipet të hyjnë brenda për t’i ndihmuar ata në identifikimin e origjinës.”
Pompeo për javë të tëra ka mbështetur publikisht teorinë se virusi që ka infektuar afro 1.5 milionë amerikanë e ka origjinën nga Instituti i Virologjisë në Wuhan, duke pretenduar në një intervistë në fillim të këtij muaji se kishte ‘prova të mëdha’ për këtë.
Ai më vonë pranoi se ai nuk mund të ishte i sigurt për origjinën e tij dhe se provat mund të ishin të gabuara.
Qeveria kineze ka hedhur poshtë akuzat, duke e përshkruar këtë si një njollë që synon të forcojë shanset e rizgjedhjes së presidentit amerikan Donald Trump.
