Kryetari i Partisë Demokratike Sali Berisha dënoi ndalimin e protestuesve një ditë më parë gjatë tubimit para parlamentit. Në një komunikim me gazetarët Berisha akuzoi policinë se përdori dhunë ndaj protestuesve paqësorë.
“E kam quajtur një egërsi shtazore. E kam quajtur një egërsi shtazore. Unë kam parë, s’ua di emrat, përveç Goxhajt që e ka shpallur Edi Rama agjent të SHIK-ut, po ata të tjerë me radhë, me radhë, të cilët absolutisht nuk po kryenin asnjë akt dhune”, tha Berisha.
Pas kthimit nga Vjena ku mori pjesë në takimin e Partisë Popullore Evropiane, Berisha paraqiti para gazetarëve rezolutën e miratuar nga asambleja politike e PPE një ditë më parë, ku mbështetet protesta e qytetarëve. Berisha shfrytëzoi takimet në PPE për të akuzuar Kryeministrin Rama se po sulmon protestuesit.
“Dhe se ai merret në kundërshtim me çdo ligj, me të dhënat e tyre personale, me të cilat kërkon të identifikojë një lëvizje qindra mijëra qytetarëve nga Shqipëria dhe diaspora kundër tij. Konstatova me kënaqësi një mbështetje të madhe për këtë lëvizje dhe kjo u sanksionua edhe në rezolutën që asambleja politike e PPE miratoi për Shqipërinë”, tha Berisha.
Partia Popullore Evropiane në këtë rezolutë sugjeron qeverinë teknike si zgjidhje për një proces zgjedhor të lirë dhe të ndershëm në Shqipëri, një prej kërkesave kryesore të Partisë Demokratike.
