Të martën në 22 shtator pritet të hapen ofertat për kompanitë që kanë shfaqur interes për të privatizuar shërbimin e ngarkim-shkarkimit të kontenierëve në Portin e Durrësit. Komuniteti i biznesit thotë se për një procedurë të tillë është njoftuar nga media, ndërsa afati 20 ditë është shumë i shkurtër për të plotësuar dokumentacionin.
Paralelisht janë një sërë pikëpyetjesh të cilat mbeten të pasqaruara në këtë garë. I ftuar në emisinin “E-Zone” në “Vizion Plus”, Alban Zusi nga Shoqata e Eksportuesve thotë se:
Qeveria duhet të mirëmendojë cilat janë avantazhet e këtij shërbimi, çfarë humbet dhe çfarë fiton ekonomia. Nëse një shërbim që sot e ofron shteti/porti dhe nesër kalon tek privati pa asnjë kusht shtesë, për përmirismin e shërbimit, atëherë as ne dhe as ekonomia nuk ka përfitim shtesë, përvecse subjektit që do të dalë fitues.
Pikëpyetja tjetër e kësaj procedure është se kompania private që do të dalë fituese do të përfitojë 30 mln euro nga shteti, po nuk ka asnjë të dhënë cila do të jetë qasja që ajo do të ketë ndaj operatorëve që operojnë në port, lidhur me tarifat.
Nëse subjekti privat, cilidoqoftë ai, nuk më përmirëson shërbim, nuk ul tarifat, që unë të mos paguaj më 300-400 euro, por të paguajë më pak atëherë si do të stimulohet tregtia?
Në datën 22 shtator mbyllet afati i dorëzimit të oferta për këtë garë. Burime i thanë “Vizion Plus” se janë dy subjekte që janë ankuar lidhur me kriteret e përcaktuara duke kërkuar informacione shtesë.
Shërbimi i kontenierëve më parë menaxhohej nga kompania private Kurum, por ajo dështoi në përmirësimin e kushteve, çka solli në prishjen e kontratës. Kjo është tentativa e dytë që ky shërbim t’i kalojë në menaxhim privatit për 30 mln euro me afat 5 vjet.
