Kryetari i Dhomës së Përfaqësuesve të Shteteve të Bashkuara, Mike Johnson, ka deklaruar se konflikti me Iranin pritet të hyjë në një “fazë të re” shumë shpejt, duke pretenduuar se aleatët ndërkombëtarë do të bashkohen me Washingtonin për ta përfunduar operacionin.
Në një intervistë për Fox News, Johnson tha se “se do të hyjmë në një fazë të re këtu shumë shpejt. Besoj se kombet aleate do të na ndihmojnë në fazën e ardhshme dhe do ta përfundojmë këtë.”
Sipas tij, Shtetet e Bashkuara kanë arritur tashmë një objektiv strategjik kyç.
Johnson pretendoi se presidenti Donald Trump arriti të parandalonte Iranin nga posedimi i armëve bërthamore – një qëllim që, sipas tij, kanë pasur të gjitha administratat amerikane gjatë 50 viteve të fundit.
“Njerëzit e dinë se ne i prejmë kokën gjarprit. Na duhej të siguronim që sponsori më i madh shtetëror i terrorizmit të mos kishte armë bërthamore. Ky ishte objektiv i çdo administrate për 50 vitet e fundit. Donald Trump e bëri”, ka theksuar Johnson.
Ai shtoi se sfida kryesore mbetet mungesa e besimit ndaj Teheranit në çdo proces negociatash.
“Nuk mund t’u besosh iranianëve në anën tjetër të tavolinës së negociatave. Kjo është sfida”, tha ai.
