Prokuroja speciale Katica Janeva është shkarkuar zyrtarisht pasi parlamenti i Maqedonisë së Veriut e konfirmoi vendimin me 2/3 e votave.
Nga simboli dhe shpresa për të luftuar krimin dhe korrupsionin, e deri te dyshimi dhe paraburgimi për një skandal korrupsioni. Kështu filloi dhe përfundoi karriera katër vjeçare e Katica Janevës, si drejtuese e Prokurorisë Publike Speciale. Në këtë pozitë erdhi nga Prokuroria e Gjevgjelisë, ndërsa qeveria dhe opozita mbështetën zgjedhjen e saj.
Dy muaj para mbarimit të mandatit të saj, Katica Janeva dha dorëheqjen nga funksioni, në të njëjtën ditë kur ndodhi arrestimi i Boki 13 dhe Zoki Kiçeecit si të dyshuar në rastin “Zhvatja”. Pas konfiskimit të telefonave, ekspertizave dhe marrjes në pyetje, Janeva e pranoi se ishte zëri i saj në regjistrimet,që publikoi një media italiane. Një dëshmi e rëndësishme kjo për prokurorinë.
Ish prokuroja speciale po qëndron në paraburgim në burgun e Shutkës deri sa cështja të kalojë në gjykatë. Fati i ekipit që ajo rekrutoi mbetet i pasigurt derisa politikanët të bien dakord për ligjin e ri të prokurorisë. Një kusht i rëndësishëm për integrimin e vendit por edhe një mollë sherri mes mazhorancës dhe opozitës. Të dyja palët nuk po gjejnë dot kompromis edhe pse kryeministri Zaev ka deklaruar se ia ka lënë në dorë opozitës të propozojë kandidaturat.
