Nënkryetari i Partisë Demokratike, Edi Paloka reagoi këtë të enjte për situatën e krijuar në Durrës nga plehrat.
Në një deklaratë për mediat, ai akuzoi kreun e qeverisë, Edi Rama për këtë.
Sipas demokratit Paloka, gjithçka u bë për të çuar 100 milionë euro në inceneratorin e Sharrës.
“Mbushja e Durrësit me plehra dhe djegia e tyre masive në Manzë ishte një shfaqje e inskenuar e mafias së plehrave. Ajo është një shfaqje kriminale e Edi Ramës dhe e Erion Veliajt për të çuar 100 milionë euro në inceneratorin e tyre në Sharrë. Mafia e plehrave, me në krye Edi Ramën, kishte llogaritur me saktësi skenarin për të çuar 100 milionë euro para publike në xhepat e Edi Ramës, Erion Veliajt, Arben Ahmetajt dhe Taulant Ballës. Në kulmin e pandemisë, mbyllën venddepozitimin e mbetjeve në Porto Romano, përmes një tenderi të paracaktuar nga Edi Rama. Më pas, shpërndanë në disa vende të dukshme mbetjet e Durrësit. Pastaj, mafia e la Durrësin pa pastruar, në mënyrë që qytetarët të mërziten dhe të mos interesohen për aferën korruptive 100 milionë euro për largimin e plehrave nga qyteti. Dhe në fund, i dogjën plehrat publkisht, duke shkaktuar një katastrofë mjedisore në Manzë, në një zonë që merr vëmendjen si nga Tirana, ashtu edhe nga Durrësi.”
Edi Paloka garantoi se kur PD të vijë në pushtet, paratë e vjedhura, sipas tij, do t’iu kthehen shqiptarëve.
