Ministria e Ekonomisë, Kulturës dhe Inovacionit ka reaguar ndaj zërave kritikë për ndërhyrjet në ish-burgun e Spaçit, duke i cilësuar si të pabazuara dhe dashakeqe aludimet për prishje të kujtesës historike në funksion të një filmi.
Ministria sqaroi se projekti filmik për revoltën e Spaçit, synon të sjellë në ekran një nga ngjarjet më të rëndësishme të rezistencës antikomuniste.
Për shkak të amortizimit ekstrem të sitit, u kërkuan ndërhyrje minimale konservuese për të siguruar xhirimet dhe një ambient autentik.
Ndërkohë, qeveria ka hartuar dhe miratuar në vitin 2024 një plan menaxhimi për ta shndërruar Spaçin në muze të kujtesës kombëtare, duke përfshirë konsultime me mbi 50 aktorë të interesit.
Qëllimi është ruajtja e strukturave në gjendjen sa më origjinale, ndërprerja e degradimit dhe ndërtimi i një muzeu që dëshmon vuajtjet, rezistencën dhe krimet e diktaturës komuniste.
Ministria thekson se ndërhyrjet dhe filmi nuk cenojnë kujtesën historike, por përkundrazi i japin zë asaj./vizionplus.tv
