Kryeministri izraelit Benjamin Netanyahu hodhi poshtë të dielën e Pashkëve kërkesat e Hamasit për një marrëveshje armëpushimi në Gaza, duke thënë se kjo do të mbante grupin islamik palestinez në pushtet dhe do të përbënte një kërcënim për Izraelin.
Netanyahu tha se Izraeli ishte i gatshëm t’i jepte fund luftës në Gaza në mënyrë që të siguronte lirimin e pengjeve që ende mbahen nga Hamasi, që besohet se janë më shumë se 130.
Lexo edhe :
Related Posts
“Por ndërkohë që Izraeli ka treguar gatishmëri, Hamasi mbetet i ngulitur në pozicionet e tij ekstreme, e para prej të cilave është kërkesa që ne të tërheqim të gjitha forcat tona nga Rripi i Gazës, t’i japim fund luftës dhe ta lëmë Hamasin në pushtet”, tha ai.
“Izraeli nuk mund ta pranojë këtë”, shtoi ai.
“Hamasi do të ketë aftësinë për të përmbushur premtimin e tij për të kryer masakrat, përdhunimet dhe rrëmbimet e tij përsëri”, përfundoi kryeministri izraelit.
Deklarata erdhi ndërsa bisedimet e armëpushimit janë duke u zhvilluar në Kajro, ku një nga propozimet në tryezë është një armëpushim 40-ditor deri në lirimin e pengjeve dhe lirimin e një numri të burgosurish palestinezë të mbajtur në burgjet izraelite.
Një zyrtar i qeverisë izraelite i tha mediave lokale në mënyrë anonime të Shtunën e Shenjtë se Izraeli “në asnjë rrethanë nuk do të pranonte t’i jepte fund luftës si pjesë e një marrëveshjeje për lirimin e të rrëmbyerve”, duke shtuar se operacioni Rafah do të bëhej. /vizionplus.tv
