Lista e “grabitqarëve seksuale” që po trondit Hollivudin është zgjeruar edhe më tej. Aktorja Portia de Rossi, e cila prej 9 vitesh është e martuar me prezantuesen e famshme Ellen De Generes, ka akuzuar aktorin dhe producentin e njohur Steven Seagal për ngacmim seksual.
Me anë të një postimi në twitter, 44-vjeçarja rrëfen se gjatë një takimi në zyrën e aktorit, Seagal i kishte thënë se sa e rëndësishme ishte afeksioni jashtë ekranit, duke bere më pas gjeste perverse.
Megjithatë aktorja nuk e specifikoi se për audicionet e cilit film bëhet fjalë, apo kohën kur ka ndodhur incidenti.
Por, menaxheri i 65-vjeçarit ka thënë para mediave se aktori nuk ka asnjë koment lidhur me pretendimet e aktores.
Edhe disa yje të njohura të Hollovudit e kanë akuzuar Seagal për sjellje të papërshtatshme dhe shantazh seksual.
Akuzat ndaj aktorit i cili mori shtetësinë ruse nga presidenti Vladimir Putin në vitin 2016, vijnë pas një skandali seksual që ka tronditur Hollivudin kohët e fundit, ku mes emrave është edhe producenti i famshëm Harvey Weinstein.
Ndërsa kompania Netflix njoftoi se po i jep fund serialit televiziv “House of Cards” me aktorin Kevin Spacey, pas akuzave për ngacmime seksuale, largim ky që duket se i dha goditjen e fundit karrierës së aktorit, njëherësh fitues i çmimit Oscar.