“Na duhet vetëm kjo dekadë”/ Rama: Ta bëjmë Shqipërinë gur të rëndë në vendin e vet

Kryeministri Edi Rama kërkon nga qytetarët që të mbajnë në pushtet PS edhe për një dekadë, me qëllim që të çojë në rrugë të drejtë Shqipërinë. Në një takim elektoral me qytetarët në Cërrik, Edi Rama tha se vetëm PS mund të ndalë emigracionin dhe të bëjë Shqipërinë të ardhmen.

“Ne nuk kemi nevojë për shekuj, nuk kemi nevojë për dekada, sepse bota sot ka ndryshuar, teknologjia, shpejtësia e lëvizjes janë rritur në mënyrë marramendëse. Ne na duhet vetëm kjo dekadë ku kemi hyrë dhe na duhet vetëm që të mos kthehemi mbrapa e të mos bëjmë atë gabim që kemi bërë disa herë në historinë tonë e pastaj të pendohemi e të rifillojmë nga e para, si me gurin e Sizifit, ngjitet e ngjite dhe bjerë poshtë dhe fillo ngjite prapë. E nuk mbaron historia. Ne mund ta bëjmë Shqipërinë gur të rëndë në vendin e vetë në këtë rajon e ne do ta bëjmë të gjithë sëbashku. Për këtë është shumë e rëndësishme ta kuptojnë të gjithë që vota në 25 prill nuk është thjesht çështje personale, nuk është thjesht çështja jam i mërzitur, i pakënaqur, por është shumë më tepër se kaq. Është çështje e një gjykimi me peshë të madhe, njësoj si ato gjykatat amerikane ku merren njerëz me short nga populli për të vendosur për një çështje me rëndësi të drejtësisë.”

Për kundërshtarët politikë, kryesocialisti tha se e duan Shqipërinë vetëm për pushtetin dhe për ta rimarrë atë, shtoi ai, janë gati të bëjnë çdo gjë.

“Këto shqiptarët i kanë dëgjuar më parë, i kanë provuar më parë dhe do të ishte kulmi që t’i provonin përsëri, duke shkuar vetë me këmbët e tyre si cjapi tek kasapi. E unë prandaj jam i bindur që nuk do të ndodhë kështu. Njëkohësisht që jo vetëm të mos ndodhë kështu, por që ne të rimarrim një mandat të fortë për të vazhduar të ngjitemi lart e për ta çuar Shqipërinë në majën ku Shqipëria meriton, duhet të mobilizohemi gjatë gjithë këtyre ditëve, të bashkohemi gjatë gjithë këtyre ditëve, t’i harrojmë të tjerat, sepse vota për numrin 12 në fletën e votimit nuk është një votë për një parti, është një votë për ta bërë Shqipërinë të Ardhmen tonë. Ata e duan Shqipërinë vetëm për pushtetin. Kur nuk kanë pushtetin, nuk lënë gjë pa i bërë Shqipërinë. Nuk lënë dy gurë bashkë për ta bërë Shqipërinë rrëmujë. Janë gati edhe ta djegin për pushtetin e tyre, ashtu sikundër nuk lënë fjalë të ulët, nuk lënë poshtërsi, pabesi pa bërë kur flasin me të huajt për Shqipërinë.”