Eksportet e prodhimeve bujqësore të qarkut të Korçës janë ruajtur thuajse në të njëjtat nivele me një vit më parë. Kjo bëhet e ditur nga drejtori i Agjencisë Rajonale të Ekstensionit Bujqësor Vullnet Gjolla, sipas të cilit nivelin më të lartë të eksporteve e ka molla e konsumit dhe ajo industriale me rreth 6500 ton, nga rreth 85 mijë ton që është prodhimi i këtij viti për të gjithë qarkun e Korçës:
Gjolla tregon se vetëm 18% e sasisë totale të prodhimit të mollës mund të ruhet në frigoriferë në të gjithë qarkun e Korçës, ose vetëm 15 mijë ton mollë.
Rritja e kapaciteteve ruajtëse të këtij produkti është mjaft e nevojshme sipas Gjollës dhe për këtë ai i bën thirrje fermerëve që të aplikojnë në skemat e IPARD-it, apo ato të buxhetit të shtetit.
Një tjetër produkt i kërkuar nga tregu i jashtëm është edhe fasulja trenare dhe ajo kokërrmadhe, për të cilat niveli i eksporteve ka shkuar në 32 ton, ndërkohë që edhe çmimi i shitjes me shumicë në tregun vendas ka qenë i kënaqshëm për fermerët me 270 lekë për kg.
Këtë vit është rritur sipërfaqja e mbjellë me qepë në të gjithë qarkun e Korçës duke u krijuar një prodhim prej 38 mijë ton, nga të cilat rreth 370 ton janë eksportuar.
Sipas Gjollës prodhimi i qepës ka pasur një problematikë këtë vit për shkak të kalbëzimit që ka ardhur nga thatësira, por kjo nuk e ka penguar nivelin e eksporteve të cilat kanë shkuar në rreth 372 ton, duke ruajtur të njëjtat nivele me një vit më parë:
Sa i takon prodhimit të patates, Gjolla bën të ditur se nuk ka eksporte të këtij produkti pasi kërkohen analiza 3 vjeçare të cilat nuk mundësohen në qarkun e Korçës, por edhe sepse këtë vit sasi të mëdha të patates kanë qenë të infektuara nga krimbi i patates, për të cilin fermerët duhet të kryejnë dezinfektimin e tokës në mënyrë që të largohet infeksioni.
