Nga Shkodra, Presidenti Ilir Meta i dërgoi një mesazh të fortë të gjithë partive politike, duke ripërsëritur atë të ambasadores ameriakne Yuri Kim, për integritetin edhe pastërtinë e listave të kandidatëve për deputetë.
“Unë u bëj thirrje të gjitha forcave politike të distancohen nga persona të cilët kanë pasur probleme me dekriminalizimin dhe njëkohësisht të promovojnë figura të reja, figura me integritet dhe së dyti dua t’ju siguroj që populli shqiptar do të jetë shumë i qartë për t’i ndëshkuar me votën e tij të gjithë ata që do të përpiqen të marrin direkt apo në mënyrë indirekte persona të tillë, thjesht për disa vota më shumë. Ndëshkimi do të jetë tepër i rëndë, jam i sigurt me një votë mbarë popullore pasi sikurse e kam thënë dhe më parë unë jam tepër besimplotë se 25 prilli do të jetë një referendum për ringritjen morale, demokratike, ligjore dhe institucionale dhe po kështu edhe europiane dhe ekonomike për vendin tonë dhe për shumicën e familjeve shqiptare që sot vuajnë dhe ndeshen me një varfëri në rritje.”
Ndërsa për 25 prillin, kreu i shtetit përsëriti se do të jetë një referendum historik që do të sjellë ndryshimin.
“Besoj se kam qenë dhe jam tepër i qartë. 25 prilli do të jetë një referendum i mbarë popullit shqiptar për të ardhmen e tij europiane. Unë jam shumë besimplotë për këtë gjë dhe gjithmonë do të vazhdoj të jem i përkushtuar për të ardhmen europiane të Shqipërisë. Ka humbur shumë vite, nuk ka për të humbur më asnjë sekondë. Treni integrimit është nisur, mjerë ai që i del përpara pasi nuk ndalet më jo në 25 prillit, por as pas 25 prillit.”
Ilir Meta u pyet dhe mbi deklaratat e Fatos Nanos dhe shanset e tij për tu bërë president i ardhshëm.
“Nuk kam asnjë koment edhe njëherë tjetër e theksoj për zero ngjarje, për zero akuza dhe për zero, zero.”
Presidenti Meta u ndal dhe tek situata e COVID-19 duke kritikuar mazhorancën për mos marrjen e masave.
