Detaje të reja kanë dalë në dritë nga sulmi i armatosur në Kiev, ku autoritetet ukrainase konfirmojnë se autori ishte një 58-vjeçar nga Moska.
Sipas Prokurorit të Përgjithshëm, Ruslan Kravchenko, sulmuesi vrau pesë persona dhe plagosi të paktën 10 të tjerë, duke përdorur një armë automatike. Katër nga viktimat u qëlluan në rrugë, ndërsa një tjetër humbi jetën brenda një supermarketi.
Autoritetet bëjnë me dije se një zjarr shpërtheu në apartamentin në Kiev ku autori rezultonte i regjistruar si banues, pak para ose gjatë zhvillimit të sulmit.
Presidenti i Ukrainës, Volodymyr Zelensky, duke cituar ministrin e Brendshëm Ihor Klymenko, konfirmoi se sulmi ndodhi në zonën Holosiivskyi dhe se të plagosurit po marrin trajtim në spital.
Ndërkohë, kryebashkiaku i Kievit, Vitali Klitschko, njoftoi se një nga të plagosurit, një grua, ndërroi jetë në spital, duke e çuar numrin e viktimave në gjashtë.
Ministri i Brendshëm bëri të ditur se autori u neutralizua gjatë operacionit të arrestimit nga forcat speciale, pasi kishte marrë peng persona brenda supermarketit dhe kishte qëlluar edhe ndaj një efektivi policie.
Sipas autoriteteve, para ndërhyrjes, negociatorët kishin tentuar të vendosnin kontakt me autorin për të shmangur përshkallëzimin e situatës.
