Presidenti i Republikës, Ilir Meta nga Gjermania ka folur mbi çështjet e sigurisë dhe integrimin euro-atlantik të Ballkanit.
Gjatë vizitës së tij në qendrën Europiane “Xhorxh Marshall” në Garmish të Gjermanisë, si i ftuar nderi për të folur, një ndër temat për të cilat foli kreu i Shtetit ishte Kosova, ku prerazi dhe qartë deklaroi se është kundër ndryshimit të kufijve pasi kjo gjë do të cenonte sigurinë e rajonit.
Gjithashtu Meta në fjalën e tij vlerësoi Qendrën “Xhorxh Marshall”, simbol të partneritetit strategjik amerikano-gjerman, e cila ka mirëpritur dhe ka specializuar më shumë se 800 pjesëmarrës nga Shqipëria që në vitin 1993 e deri më sot.
Kreu i Shtetit ndër të tjera theksoi se zgjerimi i NATO-s dhe kompaktësia e Bashkimit Europian kundrejt rajonit të Ballkanit Perëndimor mbeten kyç për stabilitetin dhe sigurinë e rajonit tonë.
“Ndërkohë që Ballkani mbetet një punë e papërfunduar, SHBA-të dhe BE-ja duhet të mbyllin me sukses investimin e tyre të përbashkët, më historikun dhe më angazhuesin që nga përfundimi i Luftës së Ftohtë”.
Kreu i shtetit Meta ka cilezuar si arritje më të rëndësishme në rajonin tonë ka qenë politika e Bashkimit Europian për liberalizimin e lëvizjes së njerëzve. Nëpërmjet këtij procesi ne rigjetëm besimin dhe vendin tonë në Europë dhe në Aleancën Trans-Atlantike.
Gjithashtu një tjetër pike diskutimi në këtë takim ka qenë dhe projekti strategjik, që ka të bëjë me ndërlidhjen më të mirë në rajon është Korridori i Kaltër, që synon ndërtimin e një autostrade përgjatë Adriatikut dhe Jonit, nga Kroacia, Mali i Zi, Shqipëria në Greqi, duke nxitur turizmin dhe tregtinë në secilin nga vendet tona dhe rritjen e ekonomisë të rajonit në tërësi.
