Zgjedhjet e lira dhe të ndershme do ta afrojnë edhe më shumë Shqipërinë me Bashkimin Evropian, sipas presidentit Ilir Meta.
Kryetari i shtetit zhvilloi këtë të martë një bashkëbisedim me eurodeputeten Isabel Santos, të cilës ju angazhua se do të bëjë çdo gjë që të plotësohen kushtet për negociatat.
“Kënaqësi të zhvilloja sot një bashkëbisedim të sinqertë e miqësor me Raporteren për Shqipërinë në Parlamentin Europian, eurodeputeten Isabel Santos, dhe Ambasadorin e Delegacionit të BE në Tiranë, zotin Luigi Soreca. Një falenderim i veçantë për zonjën Santos, për vëmendjen e posaçme që i ka kushtuar në Projekt Rezolutën për Shqipërinë zgjedhjeve të ardhshme, fenomenit të shpopullimit dhe cënimit të lirisë së medias në Shqipëri. E sigurova se si President i Republikës do të vazhdoj të bëj çdo përpjekje për zbatimin e plotë të të gjitha kushteve, që lidhen me nisjen e negociatave të anëtarësimit. Integrimi europian i Shqipërisë kalon vetëm përmes zgjedhjeve të lira dhe të ndershme dhe ndërtimit të shtetit ligjor me institucione të pavarura dhe funksionale🇦🇱🤝🇪🇺”, tha Ilir Meta në “Facebook”.
