Për shkak të rritjes së numrit të aksidenteve të ndodhura gjatë përdorimit të monopatinave elektrike në rrugë, Ministria e Brendshme dhe Policia e Shtetit kanë vendosur ndalimin e përkohshëm të qarkullimit të tyre në rrugët publike, duke nisur nga dita e hënë.
Ministrja e Brendshme, Albana Koçiu, deklaroi se vendimi vjen si nevojë për të vendosur rregulla të qarta dhe standarde të sigurisë për këtë mjet alternativ transporti. Ajo theksoi se përdorimi i monopatinave do të lejohet vetëm për përdorim vetjak, pasi të përfundojë procesi i rregullimit ligjor dhe teknik.
“Sot i kam kërkuar Policisë së Shtetit që përkohësisht të mos lejojnë qarkullimin e monopatinave elektrike në rrugë. Gjithashtu dua të informoj të gjithë ata që e shohin monopatinën elektrike si mënyrën biznesi për dhënien me qira ditore, duhet ta kenë të qartë që të mos investojnë në këtë aktivitet. Lejimi gjithmonë pas përfundimit të këtij procesi do të jetë i vlefshëm vetëm për përdorim vetjak të këtyre mjeteve. Ne do të hartojnë rregulla të qarta dhe të zbatueshme nga të gjithë. Do qartësojmë se cilat janë korsitë, rrugët apo hapësirat ku monopatinat elektrike mund të përdoren dhe ku jo, si dhe kritere për moshën e përdorimit, masat mbrojtëse si kasa, ndriçimi apo shpejtësia e lejuar”, tha ministrja Koçiu.
Ndërkohë, drejtori i përgjithshëm i Policisë së Shtetit, Ilir Proda, deklaroi se uniformat blu do të angazhohen në një operacion të posaçëm për zbatimin e këtij vendimi, duke filluar nga dita e hënë.
“Kërkojmë mirëkuptimin e qytetarëve për këtë proces. Ky është një hap i nevojshëm për të garantuar sigurinë rrugore dhe për të shmangur rreziqet që lidhen me përdorimin e pakontrolluar të monopatinave,” – tha Proda.
/vizionplus.tv
\
