Në ditën e fundit të vizitës së punës në Berlin, Ministri i Brendshëm, Sandër Lleshaj dhe Ministrja e Drejtësisë Etilda Gjonaj morën pjesë si të ftuar në konferencën “One Forensics”, Forensic and Integrity Services.
Ministri Lleshaj ofroi tek të pranishmit ndërkombëtarë një retrospektive të historisë së Shqipërisë, duke theksuar se tashmë vendi është shumë pranë portës europiane.
“Është mirë të kesh ura, por jo aq mirë të jesh në vetvete urë. E shpesh Shqipëria ka luajtur këtë funksion pa përfituar asgjë”, tha Lleshaj.
Lleshaj më tej prezantoi edhe sfidat e vendit në luftën kundër krimit. Ai nënvizoi se krimi ekonomik-financiar dhe pastrimi i parave mbeten objektivi kryesor i zhvillimit të hetimeve në Policinë e Shtetit.
Ndërsa nga ana tjetër Ministrja e Drejtësisë njohu pjesëmarrësit me rezultatet dhe ecurinë e reformave që Shqipëria ka ndërmarrë. Ajo informoi se modeli i implementuar i Reformës në Drejtësi është unik, jo vetëm në rajonin e Ballkanit Perëndimor, por edhe në BE, sepse sistemi, sipas saj, do të garantojë paanshmërinë dhe pavarësinë e sistemit të drejtësisë.
Ministrja Gjonaj tha se organet e reja të drejtësisë kanë filluar funksionimin, e së shpejti pritet të plotësohen vakancat në sistemin gjyqësor, e të ngrihen institucionet e reja duke veçuar rëndësinë që do të ketë Prokuroria Speciale, SPAK, që do të hetojë dhe nxjerrë para drejtësisë këdo, përfshirë edhe zyrtarët e lartë të përfshirë në afera korruptive.
